Қолданбалы этносаяси зерттеулер институтының өкілдері Щучинск қаласында «Nomadius» этнографиялық мұражайының ашылуына қатысты

Іс-шара аясында Қазақстан халқы Ассамблеясының Ғылыми-сараптамалық кеңесінің төрағасы, әлеуметтану ғылымдарының докторы Айгүл Сәдуақасова бастаған институт делегациясы мұражай басшысы Жамбыл Омарұлы Артықбаевқа отандық этнографиялық ғылымды дамытуға және оны көпшілік арасында танымал етуге қосқан зор үлесі үшін шын жүректен құттықтау сөз сөйледі.

Айгүл Садвоқасова: «Қазақстанның ең көркем және тарихи орындарының бірі Бурабайда «Nomadius» этнографиялық мұражайының ашылуы - отандық этнографиялық ғылымды дамытудағы және оны қоғамдық кеңістікте таныстырудағы үлкен қадам. Бұл аймақ мәдениетіміздің пайда болу, даму және кеңею орны ретінде қазіргі әралуанды әлемде ұлттық бірегейлікті қалыптастырудың маңызды құрамдас бөлігі болып саналады. «Nomadius» музейі де болашақта Қазақстанның тарихи уақыты мен кеңістігінде өз орнын алатынына сенімдіміз. Осындай жобаны жүзеге асырудағы Сіздің идеяңыз бен баға жетпес еңбегіңіз терең ғылыми және патриоттық мағынаға ие. «Nomadius» этнографиялық мұражайының ресми тұсаукесері күні шын жүректен айтылатын құттықтау мен алғыс сөздерімізді қабыл етіңіз! Мұражайды дамыту, оның бай қорын ұлғайту және еліміздің бейбітшілігі мен келісімін нығайту мақсатында жемісті жасампаздық тілейміз!» - деп өз сөзін қорытындылады.

«Nomadius» мұражайының ашылуы тек аймақ үшін ғана емес, бүкіл ел үшін маңызды оқиға болды. Музей Қазақстанның бай мәдени мұрасын сақтауға және насихаттауға баға жетпес үлес қосатынына сенімдіміз.